1 Kings 8

Biakinnpi ah Singkuangpi Kitun

1Tua ciangin Kumpi Solomon in David Khuapi Zion panin ama omna Jerusalem ah TOPA thukhun singkuangpi puato dingin Israel upate, beh lutangte khempeuh, Israel innkuan a ukpite khempeuh a khawm hi. 2Israel mite khempeuh a kha sagihna Ethanim kha pawikham hun in Kumpipa Solomon kiangah a kikhawm uh hi. ^a

3 Israel upate khempeuh a tun khit uh ciangin siampite in thukhun singkuangpi lakhia uh a, 4TOPA thukhun singkuangpi le Kikhopna Puanbuk le a sunga vanzat siangtho khempeuh a puato uh hi. Siampite le Levi-te in tuate puato uh a, 5Kumpi Solomon le ama gei-a kikhawm Israel mi buppi in singkuangpi mai-ah tuu le bawngtalte tam pia lua uh ahi manin kisim zo lo-a, kiciamteh thei lo hi.

6 Tua ciangin siampite in TOPA thukhun singkuangpi pua in biakinnpi-a munsiangtho sunga koih nading mun Mun Siangtho Pen a cherub-te kha nuai santak ah a koih uh hi. 7Cherub-te in singkuangpi koihna mun tungah a khate uh zaakin singkuangpi le a zawnna zawlte a khate-un a liahsuk uh hi. 8A zawlte sau lua ahi manin mun siangtho sungnung mai Mun Siangtho panin a mongte kimu thei a, ahi zongin Mun Siangtho pualam panin a kimu thei kei hi; tua hi a tuate tuni dongin tua lai-ah a om lai hi. 9Israel-te Egypt panin a paikhiat khit ua TOPA in amaute tawh Horeb a, a bawl thukhun suangpek nih longal singkuangpi sungah adang bangmah a om kei hi. ^b

10 Mun Siangtho pan siampite a paikhiat uh ciangin TOPA biakinnpi sungah meiipi a dim hi. 11TOPA biakinnpi sungah ama minthanna dim ahi manin meiipi hangin siampite in a biakna uh a sem thei nawn kei uh hi. ^c

12 Tua ciangin Solomon in, “TOPA in meii mialpi lakah ka teng ding hi, ci hi; 13a tawntunga na ten nading mun biakinn thupi mahmah khat kong lamsak takpi hi,” a ci hi.

14 Israel mihonpite tua lai-ah a dindin laitakun kumpipa kilehhei kawikawi-in amaute thupha a pia hi. 15Tua ciangin amah in:

“Ka pa David tungah ama kama a thuciam, ama khuta a tangtung-sakpa TOPA Israel Pasian kiphat ta hen. Ahang in, amah in, 16‘Ka mi Israel-te Egypt panin ka paikhiatpih ni-a kipan ka Min a ten theih nadingin biakinnpi lam nading Israel behte khempeuh khuapi khatpeuh ka teel kei hi; ahi hangin ka mi Israel a uk dingin David ka teel khin hi’ ci hi. ^d
17 “Ka pa David in TOPA, Israel Pasian Min ading biakinnpi lam ding a lungsimin a nei khin hi. 18Ahi hangin TOPA in ka pa David tungah, ‘Keima Min dingin biakinnpi khat lam ding na lungsima, na neih a hoih hi. 19Ahi zongin biakinnpi lam ding nang hi loin, nangma si le sa mah ahi na tapa hi a - amah in ka Min ading biakinnpi a lam ding hi,’ ci hi.
20 “TOPA in a thuciamsa zui-a, TOPA in a ciamsa bangin: Keimah in ka pa David za ka luah a, Israel kumpi tokhom tungah tu-in TOPA, Israel Pasian Min dingin biakinnpi khat ka lam khin hi. 21Amah in amaute Egypt panin a paikhiatpih lai-in TOPA in i pate tawh a thukhunna singkuangpi koih nading mun khat ka bawlsak khin hi,” a ci hi. ^e

Solomon’ Apna Thungetna

22 Tua ciangin Israel mihonpi mai-a TOPA biakna-tau mai-ah Solomon dinga a khutte vanlamah zaakto-in: 23“TOPA,

Israel Pasian aw, tunga van ah ahi-a, nuai-a lei-ah ahi zongin nang bang Pasian a om kei hi - nang in lungsim khempeuh tawh na lampi a zuisuak na nasemte tawh na itna thukhun na lenkip hi. 24Nang in na nasem ka pa David tunga na kamciam na lenkip hi; ama tungah na kamin na kiciam a, tuni-a bang lianin na khutin na tangtungsak hi.
25 Tu-in TOPA, Israel Pasian aw, na nasempa ka pa David tungah: ‘Nang in ka mai-ah na hih bangin na tapate in amau nasepnate khempeuh ah kidawmin a kalsuan uh leh ka mai-a Israel kumpi tokhom tunga tu ding mi a kitasam ngei kei ding hi,” ci-a na thuciam lenkip in. 26Tua hi a Israel Pasian aw, tu-in na nasempa ka pa tungah na thuciam hong tangtungsak in. ^f
27 Ahi hangin leitungah Pasian teng takpi ding ahi hiam? Vante, a sangpen van nangawn ah nang na ta zo kei hi. Hih ka lamsa biakinnpi neuzaw lua mahmah hi lo hiam! 28Hitaleh na nasempa in nong lainat ding kong thungetna le kong thumna hong thusimsak in TOPA ka Pasian aw. Tuni-in nangma omna ah na nasempa hong kikona le hong nget thungetna hong za in. 29Nangmah in, ‘Tua lai-ah ka Min a om ding hi,’ na cihna mun hih lam nga-in na nasempa in thu hong ngetna na zak thei nadingin hih biakinnpi lam nga-in sun le zanin hong mitsuan ta in. 30Na nasempa le na mi Israel mite in hih mun lam nga-in hong thumna uh za in. Nangma tenna vantung panin za inla na zak ciangin a mawhna uh maisak in.
31 “Mi khat a vengpa tungah khialin kiciam a kul a, hih biakinnpi sung na biakna-tau mai-ah hong pai-a a kiciam ciangin 32van panin na za inla na sem in. Na nasemte kikal ah thu khen inla a khialpa mawhpaihin a gamtatna ama lutungah tusak in. Mawhpengpa mawh lo hi cikhia inla ama mawhpenna kipsak in. ^g
33 Na mi Israel mite nang tunga hong mawhna uh hangin gal khat in a zawh a, nang kiangah hong kileh kikin hih biakinnpi sungah na min hong pulakin, thungenin hong thum uh leh 34tua ciangin vantung panin na za inla na mi Israel a mawhna maisakin amau pate tunga na piaksa gamah amaute tunpih kik in. ^h
35 “Na mite nang tungah hong mawhna uh hangin vante kikhakin guah a zuk kei a, a mawhna uh hangin gimna na thuaksak a, amaute amawhna pan kihei-in hih mun lam nga-in na min hong pulak uh leh 36tua ciangin van panin na za inla na nasemte, na mi Israel mawhna maisak in. Amaute nuntakna lampi maan hilh inla na mite luah dinga na piak leitangah guah zusak in. ⁱ
37 Hih gamah kialpi ahi a pulpi ahi zongin a tun a, ahikeh an cinghteekna, an maibuakna, kaukhup, kauphe tunna ahikeh amau khuapite khatpeuh galte in umcih a, haksatna natna khatpeuh a tuah uh a, 38na mi Israel-te khatpeuh in thungetna ahi-a thumna ahi zongin hong bawl a - ama lungsim gimna kithei in hih biakinnpi lamah a khut hong zak leh - 39tua ciangin na tenna mun vantung panin na za in. Maisak inla na sem in; mikim lungsim na theihsa ahi nungsang ama sepsa khempeuh tawh kizui-in ngahsak in (ahang in, nang bek in mihing lungsim na thei hi) 40tua hileh ka pate uh na piaksa gamah a ten laiteng uh nang hong kihta pah ding uh hi. ^j
41 “Na mi Israel-te tawh a kisai khak loh uh hangin gamlapi panin na min hangin gamdang mite hong pai ding uh hi - 42ahang in, mite in na min liatna, na khut thahatna le na ban zankhiatna za ding uh hi - tua ciangin hong pai-in na biakinnpi lam nga-in thu hong nget uh leh 43na tenna mun vantung panin na za inla Israel-te theih bangin hih ka lamsa na inn in na Min a puak lam leitung mi khempeuh in thei a, nang hong kihtak nadingun gamdang mipa a ngetna na pia in. ^k
44 “Na sawlna peuhah na mite a galte uh sim dingin a kuan uh ciangin, na teelsa khuapi le nangma Min a ka lamsa biakinnpi lam nga-a TOPA tungah thu hong nget uh ciangin 45amaute thunget-na le thumna vantung panin za inla amaute thu panpih in. ^l
46 “Amaute nang tungah hong mawh uh ciangin - ahang in, mawhna bawl lo mi khatbeek om lo hi - amaute tungah na heh-a, a galte uh tungah pia-in, a nai a gamla ah amaute in amau gamah salin a kaih uh ciangin salin a omna uh gamah 47amaute a lungsim uh kikhel a, kisikin amau a zote gamah hong thum uh a, ‘Ka mawh zo uh hi, ka khial zo uh hi, a gilo in ka gamta khin uh hi,’ hong cih uh a, 48amaute salin a kai a galte uh gamah a lungsim uh a hinna khempeuh uh tawh nang tungah hong kihei kik uh a, a pate uh na piaksa leitang lam, na teelsa khuapi lam, na Min adingin ka lamsa biakinnpi lam nga-in thu hong nget uh leh, 49na omna mun vantung panin amau thungetna le amau thumna za-in a thu uh panpih in. 50Tuateh nang tunga hong mawh na mite maisak in; nang tunga a thupalsatnate khempeuh uh maisak inla amau a zote lainatsak in; 51ahang in, amaute nangma mi, nangma gouluahte, Egypt pan - sikhaltuina pum mei mai pana na paikhiatpihte ahi uh hi. ^m
52 “Na nasempa thumna le na mi Israel-te thumna lam hong nga inla nang tungah kong kiko peuhpeuh uh ciangin hong za in. 53Ahang in Thuneipipen TOPA in, Egypt panin ka pate uh na paikhiatpih lai-a na nasempa Moses tungtawna na pulaksa bang tektekin leitung buppi-a minam khempeuh panin na gouluah dingin amaute na tang koih ahi hi,” a ci hi. ⁿ

54 Solomon in hih TOPA tunga thungetnate le thumnate khempeuh a man khit ciangin khukdinin van lamah a khut zaak-a a omna TOPA biakna-tau mai panin amah dingto hi. 55A dinsa in Israel mihon buppi thupha pia-a, a aw sangsakin:

56 “Ama thuciamsa bang tektekin ama mi Israel-te tungah tawldamna a pia TOPA kiphat ta hen. Ama nasempa Moses tungtawna a piak thuciam hoih khempeuh khat beek a kipelh a om kei hi. 57TOPA eite Pasian in i pate a ompih bangin eite hong ompih ta hen; eite hong nusia-in hong taisan kei hen. 58Amah in i pate a piaksa lampite khempeuh a tawn ding le a thupiakte, a thukipte le zuih ding ngeinate a zui dingin i lungsimte ama lamah hong hei ta hen. 59Tuateh hih keima thugente, TOPA mai-a ka thungetnate sun le zanin TOPA eite Pasian tawh kinai henla nisimin a kisapna tawh kizui-in ama nasempa le ama mi Israel-te thu panpih ta hen; 60tua ciangin leitung mi khempeuh in TOPA in Pasian hi-a adang a om kei hi, cih a thei ding uh hi. 61Ahi hangin TOPA eite Pasian tungah na lungsim neih khempeuh uh pel loin ap unla tu huna na om bangun ama thukipte bangin nungta-in ama thupiakte mang un,” a ci hi. ^o

Biakinnpi Apna

62 Tua ciangin kumpipa le a ompih Israel khempeuh in TOPA mai-ah biakna a luui uh hi. 63Solomon in TOPA tungah kilawmtakna biakna ▼

▼8.63 Tang ngeina-in kilemna biaknate tg. 64 ah zong

in: bawngtal tul sawmnih le tul nih le tuu le keel tulza le tul sawmnih a pia hi. Tua bangin kumpipa le Israel-te khempeuh in TOPA biakinnpi a ap uh hi.

64 Tua ni mah in kumpipa in TOPA biakinnpi mai-a huang laizang teng ap-a, tua lai-ah meihal biakna, an-a biakna le kilawmtakna biaknate’ thau a pia hi, bang hang hiam cih leh meihal biaknate, an-a biaknate le kilawmtakna biaknate’ thaute adingin TOPA mai-a sumngo biakna-tau a neu lua hi. ^q

65 Tua ciangin Solomon le amah tawh a omkhawm Israel khempeuh - Lebo ▼

▼8.65 Ahikeh a sunga lutna panin

Hamath pan Egypt Wadi dunga mipi hon tampi tawh pawi a bawl khawm uh hi. Amaute in TOPA eite Pasian mai-ah ni sagih sung pawi bawlin, ni sagih sung mah pawi bawl beh lai uh a, ni sawm le nili sung a bawl uh hi. 66A zing ciangin amah in mite a ciahsak hi. Amaute in kumpipa thupha pia uh a, TOPA in a nasempa David le a mi Israel tungah a sepsa a hoih khempeuh hangin a lungsim uh nuamsa in kipaksa-in a inn uah a ciah uh hi. ^s